Kalittokai

((Originally extracted from master file ^KALI.OCP))
((Last updated on 2004 April 14th))

• {KALI 144-1} nal nutāal kāṇṭai niṉaiyā neṭitu uyirā
• {KALI 144-2} eṉ uṟṟāḷ kol ō iḵtu otti pal māṇ
• {KALI 144-3} nakutarum taṉ nāṇu kaiviṭṭu ikutarum
• {KALI 144-4} kaṇṇīr tuṭaiyā kaviḻntu nilaṉ nōkki
• {KALI 144-5} aṉṉa iṭumpai pala ceytu taṉṉai
• {KALI 144-6} viṉavuvārkku ētila colli kaṉavu pōl
• {KALI 144-7} teruḷ um maruḷ um mayaṅki varupavaḷ
• {KALI 144-8} kūṟupa kēḷāmō ceṉṟu
• {KALI 144-9} ellā nī eṉ aṇaṅku uṟṟaṉai yār niṉ itu ceytār
• {KALI 144-10} niṉ uṟṟa allal urai eṉa eṉṉai
• {KALI 144-11} viṉavuvīr teṟṟeṉa kēṇmiṉ oruvaṉ
• {KALI 144-12} kural kūntāl eṉ uṟṟa evvam niṉakku yāṉ
• {KALI 144-13} uraippaṉai taṅkiṟṟu eṉ iṉ uyir eṉṟu
• {KALI 144-14} maruvu ūṭṭi māṟiyataṉ koṇṭu eṉakku
• {KALI 144-15} maruvu uḻi paṭṭatu eṉ neñcu
• {KALI 144-16} eṅku um terintu atu koḷvēṉ avaṉ uḷ vaḻi
• {KALI 144-17} poṅku iru munnīr akam ellām nōkkiṉai
• {KALI 144-18} tiṅkaḷ uḷ tōṉṟi irunta kuṟu muyāl
• {KALI 144-19} em kēḷ itaṉ akattu uḷ vaḻi kāṭṭīmō
• {KALI 144-20} kāṭṭīyāy āyiṉ kata nāy koḷuvuvēṉ
• {KALI 144-21} vēṭṭuvar uḷ vaḻi ceppuvēṉ āṭṭi
• {KALI 144-22} matiyoṭu pāmpu maṭuppēṉ mati tirinta
• {KALI 144-23} eṉ allal tīrāy eṉiṉ
• {KALI 144-24} eṉṟu āṅku ē uḷ niṉṟa evvam uraippa matiyoṭu
• {KALI 144-25} veḷ maḻai ōṭi pukuti ciṟitu eṉṉai
• {KALI 144-26} kaṇṇōṭiṉāy pōṟi nī
• {KALI 144-27} nīṭu ilai tāḻai tuvar maṇal kāṉal uḷ
• {KALI 144-28} ōṭuvēṉ ōṭi oḷippēṉ poḻil toṟum
• {KALI 144-29} nāṭuvēṉ kaḷvaṉ karantu irukkaṟpālaṉ kol
• {KALI 144-30} āy pū aṭumpiṉ alar koṇṭu utu kāṇ em
• {KALI 144-31} kōtai puṉainta vaḻi
• {KALI 144-32} utu kāṇ cāay malar kāṭṭi cālpu ilāṉ yām āṭum
• {KALI 144-33} pāvai koṇṭu ōṭiyuḻi
• {KALI 144-34} utu kāṇ toyyil poṟitta vaḻi
• {KALI 144-35} utu kāṇ taiyāl tēṟu eṉa tēṟṟi aṟaṉ illāṉ
• {KALI 144-36} paiya muyaṅkiyuḻi
• {KALI 144-37} aḷiya eṉ uḷḷattu uyavu tēr ūrntu
• {KALI 144-38} viḷiyā nōy ceytu iṟanta aṉpu ilavaṉai
• {KALI 144-39} teḷiya vicumpiṉum ñālattu akattu um
• {KALI 144-40} vaḷi ē etirpōm pala katir ñāyiṟṟu
• {KALI 144-41} oḷi uḷ vaḻi ellām ceṉṟu muṉipu emmai
• {KALI 144-42} uṇmai nalaṉ uṇṭu oḷittāṉai kāṭṭīmō
• {KALI 144-43} kāṭṭāyēl maṇṇakam ellām oruṅku cuṭuvēṉ eṉ
• {KALI 144-44} kaṇṇīr aḻalāl teḷittu
• {KALI 144-45} pēṇāṉ tuṟantāṉai nāṭum iṭam viṭāy āyiṉ
• {KALI 144-46} piṟaṅku iru munnīr veṟu maṇal āka
• {KALI 144-47} puṟam kāliṉ pōka iṟaippēṉ muyaliṉ
• {KALI 144-48} aṟam puṇai ākal um uṇṭu
• {KALI 144-49} tuṟantāṉai nāṭi tarukiṟpāy āyiṉ niṉakku oṉṟu
• {KALI 144-50} pāṭuvēṉ eṉ nōy uraittu
• {KALI 144-51} pulliya kēḷir puṇarum poḻutu uṇarēṉ
• {KALI 144-52} elli āka ellai eṉṟu āṅku ē pakal muṉivēṉ
• {KALI 144-53} elliya kālai irā muṉivēṉ yāṉ uṟṟa
• {KALI 144-54} allal kaḷaivār ilēṉ
• {KALI 144-55} ōo kaṭal ē teṟṟeṉa kaṇ uḷ ē tōṉṟa imai eṭuttu
• {KALI 144-56} paṟṟuvēṉ eṉṟu yāṉ viḻikkum kāl maṟṟu um eṉ
• {KALI 144-57} neñcattu uḷ ōṭi oḷittu āṅku ē tuñcā nōy
• {KALI 144-58} ceyyum aṟaṉ illavaṉ
• {KALI 144-59} ōo kaṭal ē ūr talaikkoṇṭu kaṉalum kaṭum tī uḷ
• {KALI 144-60} nīr peyta kāl ē ciṉam taṇiyum maṟṟu iḵtu ō
• {KALI 144-61} īram il kēḷvaṉ uṟīiya kāma tī
• {KALI 144-62} nīr uḷ pukiṉum cuṭum
• {KALI 144-63} ōo kaṭal ē eṟṟam ilāṭṭi eṉ ēmuṟṟāḷ eṉṟu i nōy
• {KALI 144-64} uṟṟu aṟiyātār ō nakuka nayantāṅku ē
• {KALI 144-65} iṟṟā aṟiyiṉ muyaṅkalēṉ maṟṟu eṉṉai
• {KALI 144-66} aṟṟattu iṭṭu āṟṟu aṟuttāṉ mārpu
• {KALI 144-67} āṅku
• {KALI 144-68} kaṭaloṭu pulampuvōḷ kalaṅku añar tīra
• {KALI 144-69} keṭal arum kātalar tuṉai tara piṇi nīṅki
• {KALI 144-70} aṟaṉ aṟintu oḻukum aṅkaṇāḷaṉai
• {KALI 144-71} tiṟaṉ ilār eṭuttu tī moḻi ellām
• {KALI 144-72} nal avai uḷ paṭa keṭṭāṅku
• {KALI 144-73} illākiṉṟu avaḷ āy nutal pacappu ē